Über uns, Metbejrönder . . . 

...e paar Wöötcher vun nem Metbejrönder...

Als Metbejrönder he e paar Wöötcher zo sage
bei demm Jubiläum loch ald lang mer em mage.

Et wor 1970 do troke mer loß
leefe zo fünef met Musik op de Stroß.
No wor Fastelovend, all woren noch röstich
un mer met dä Musik woren ärch löstich.
Spillten nit schön, doför ävver laut
uns han se do met en dä Zoch rennjedaut.

Jo ´71 däten uns Quös dann met blose,
se kunnten bes hück dovun nit loße.
En dä verjangene Johre es wal vill passeet
un öntlich tröte hanse och dobei jeleht.
Se künne nit nor dat Blosrühr jot blose
verston och us ner Bierfläsch de Luff erus zo loße.

Zwei mol de Woch mer probe se höt
donoh weed ahn dr Thek dann wigger jetröt.
Jesellichkeit en Flittard weed jroß jeschrevve
se es och e Deil vun dem M.C. Levve.

Et probe es wichtig, mer vill zo lihre kritt
wä do fuul es, lihrt et em Levve nit
Nit nor Käls spille do en demm Verein.
Wat wören die ohne die Weechter? Se wören janz klein.
Un och bei nem Feß, ohne die Weechter ehr Junge
doför Ersatz wör su flöck nit jefunge.
Neue kome, ahle jinge dat es ens esu,
doch dä Stamm es jeblevve, un dat mät mich fruh.
Us nem kleine Verein, do wood ene jroße.
Hück dunn se sujar vör de Altstädter blose.

30 Johr dat reck üch zor Ihr,
dröm simmer all he, bei üch op dä Fier.
Zo demm Jubiläum dummer hätzlich jrateleere,
un bes en de Naach met üch he noch feere.

Ich wollt et blev iwich de Musik ühr Hobby
et wünsch alles Jode us Flittard dä

                Robby  (Robert Gentzsch, Gründungs- und Ehrenmitglied)

 

 |  Willkommen  |  Übersicht  |  Vorstand  |  Geschichte  |  Zurück  |